काठमाडौंबाट लमजुङतर्फ आउने क्रममा लमजुङको राइनास नगरपालिकाको ग १ झ ४२३ नम्बरको स्करपियो पृथ्वी राजमार्ग अन्तर्गत धादिङको आदमघाटमा दुर्घटना हुँदा नगरप्रमुखसहित ४ जना घाइते भएका छन्।
शुक्रबार राति साढे ८ बजे नगरपालिकाको स्करपियो दुर्घटना हुँदा नगरप्रमुख खड्गबहादुर गुरुङ, प्रमुख प्रशासकीय अधिकृत गोकर्णराज सुयल, नगरपालिका प्रमुख गुरुङका स्वकीय सचिव बालसिंह गुरुङ र चालक जीवन ओलिया घाइते भएका हुन्।
जिल्ला प्रहरी कार्यालय धादिङका प्रहरी नायब उपरीक्षक श्याम बहादुर खत्रीका अनुसार नम्बर नखुलेको मोटरसाइकलले बाटो काट्ने क्रममा स्कारपियो अनियन्त्रित भई दुर्घटना भएको हो। उनका अनुसार दुर्घटनामा परि घाइते भएकाहरुको उपचारको लागी आदमघाट अस्पताल पठाइएको थियो। हाल घाईतेहरुको सामान्य उपचारपछि सबै अस्पतालबाट फिर्ता भएको उनले बताए।
नगरपालिकाको कामका लागि काठमाडौं गएको नगरप्रमुखसहितको टोली फर्किने क्रममा दुर्घटनामा परेको हो।
from Nagarik News - Home नागरिक